سه‌روكێ هه‌رێما كوردستانێ پێشوازى ل ئاشتن كارته‌ر وه‌زیرێ به‌ره‌ڤانیا ئه‌مریكا و شاندێ دگه‌لدا كر
| مەسعود بارزانی دگەل ئاشتون کارتەری |
د دیداره‌كێدا وه‌زیرێ به‌ره‌ڤانیا ئه‌مریكا خوشحالیا خو بو سه‌ره‌دانا كوردستانێ و دیدارا دگه‌ل سه‌روك بارزانى نیشاندا و سوپاسیا هه‌ماهه‌نگى و كارێن هه‌ڤپشك كر كو دناڤبه‌را سوپایێ ئه‌مریكا و هێزێن پێشمه‌رگه‌ى دا دهێنه كرن و ب كاره‌كێ نموونه‌یى و سه‌ركه‌فتى لێ قه‌له‌م دا. هه‌روه‌سا حێبه‌تیا خو ژى نیشان دا ب ئازایه‌تى و زیره‌كیا هێزێن پێشمه‌رگه‌ى ل شه‌رێ دژى تیرورستان و سه‌ركردایه‌تیكرن و برێڤه‌برنا ڤى شه‌رى. وه‌زیرێ به‌ره‌ڤانیا ئه‌مریكا پێگیریا وه‌لاتێ خو بو هاریكاریكرنا كوردستانێ و هێزێن پێشمه‌رگه‌ى و دابینكرنا چه‌ك و پێدڤیێن له‌شكرى دووپاتكر و هه‌ڤپه‌یمانیا دناڤبه‌را هه‌رێما كوردستانێ و ئه‌مریكا ب هه‌ڤپه‌یمانیه‌كا مه‌زن بو به‌رقراركرنا ئاشتیێ ل ده‌ڤه‌رێ لێ قه‌له‌م دا.
د به‌رامبه‌ر دا سه‌روك بارزانى ب گه‌رمى بخێرهاتنا شاندێ مێهڤان كر و سوپاسیا خه‌لك و سه‌روك و حكومه‌ت و سوپایێ ئه‌مریكا كر كو پشته‌ڤانێ هه‌رێما كوردستانێ بووینه و ئاشكراكر كو ب كارێن هه‌ڤپشك شیاینه سه‌ركه‌فتنێن مه‌زن ب ده‌ست ڤه بینن، هه‌روه‌سا رازیبوونا خو ژى ل ئاستێ هه‌ماهه‌نگیێ دناڤبه‌را سوپایێ ئه‌مریكا و هێزێن پێشمه‌رگه‌ى نیشاندا كو گه‌له‌ك ب هویرى و هشیارى ب ره‌نگه‌كێ كو حه‌تا نوكه چ زیان نه گه‌هشتینه خه‌لكێ سڤیل.
د درێژیا ئاخفتنێن خودا سه‌روك بارزانى به‌حسێ شه‌رێ تیرورستێن داعش و دووپاتى لسه‌ر وێ چه‌ندێ كر كو جهێ شانازیێ یه هێزێن پێشمه‌رگه‌ى ب نوینه‌راتیا جیهانێ شه‌رێ تیرورێ دكه‌ن و دگه‌ل وێ چه‌ندێ ژى دا ئه‌ڤ شه‌ره بتنێ شه‌رێ لایه‌نه‌كێ نینه دگه‌ل تیرورێ ، به‌لكو شه‌رێ هه‌مى لایه‌كێ یه . له‌وما ب كارێ هه‌ڤپشك و پێكڤه دهێته كرن و ئه‌نجام و سه‌ركه‌فتنێن گه‌له‌ك باش بدستڤه دئینن.
هه‌ر د كومبوونێ دا به‌حسێ چه‌وانیا بلندكرنا هه‌ماهه‌نگیێ دناڤبه‌را هێزێن پێشمه‌رگه‌ى و سوپایێ ئه‌مریكا و پێدڤیێن هێزێن پێشمه‌رگه‌ى كر و پلانا ئازادكرنا باژێرێ مویسل و شكاندنا تیرورستێن داعش ل سوریێ هاته به‌حسكرن و گه‌نگه‌شه‌كرن. سه‌باره‌ت ب پروسا ئازادكرنا باژێرێ مویسل سه‌روك بارزانى ئاماژه ب قوناغا پشتى ئازادكرنا مویسل دا و و دووپاتكر كو به‌رچاڤ گرتنا ره‌وشا دیموگرافیا مویسل پێدڤییه پێكهاتێن نه‌ته‌وه‌یى و ئایینى بتمامى بهێنه پشت راستكرن كو توشى كاره‌سات و نه‌هامه‌تیا نه‌بنه‌ڤه و ماف و داخازیێن وان بهێنه مسوگه‌ر كرن.
سه‌باره‌ت روى ب روى بوونا تیرورستان ل سوریێ ، سه‌روك بارزانى ئاماژه ب وێ چه‌ندێ دا كو د دژایه‌تیكرنا تیرورێ دا ره‌وشا عیراق و سوریێ پێكڤه گرێدایه و پێدڤییه ل هه‌ر دوو جهان تیرورست بهێنه شكاندن و ژناڤبرن . لسه‌ر ئاستێ ده‌ڤه‌رێ ژى دا سه‌روك بارزانى ئه‌و ژى بو شاندێ مێهڤان به‌حسكر كو نابیت چ لایه‌ك تیرورێ وه‌ك كارته‌كا سیاسى ل دژى لایه‌كێ دى بكاربینیت ، چونكه دوماهیێ دێ به‌ر ئاگر و زیانێن تیرورێ كه‌ڤیت.
دڤێ دیدارێ دا مسته‌فا سه‌ید قادر وه‌زیرێ پێشمه‌رگه‌ى و فه‌لاح مسته‌فا به‌رپرسێ فه‌رمانگه‌ها په‌یوه‌ندیێن حكومه‌تا هه‌رێمێ و ئه‌نوه‌ر حاجى عو سمان بریكارێ وه‌زاره‌تا پێشمه‌رگه‌ى و جه‌عفه‌ر شێخ مسته‌فا و فه‌ریق شێروان عه‌بدولره‌حمان و فه‌ریق جه‌بار یاوه‌ر ئه‌ندامێن فه‌رمانده‌یا گشتى یێن هێزێن پاراستنا هه‌رێمێ د ئاماده‌بوون .
جهێ ئاماژه‌پێكرنێ یه به‌رى كومبوون بهێته ده‌ستپێكرن وه‌زیرێ به‌ره‌ڤانیا ئه‌مریكا ل ده‌فته‌را پروتوكولى یا سه‌روكاتیا هه‌رێمێ بیرهاتنه‌ك نڤیسى كو ئه‌ڤا ل خارێ ده‌قێ وێ یه:
بو سه‌روك بارزانى و هاریكارێن وى:
دگه‌ل شانازیه‌كا مه‌زن بو زیره‌كى و ئازایه‌تیا هێزێن پێشمه‌رگه‌ى و حیكمه‌تا حكومه‌تا هه‌رێما كوردستانێ و دوستایه‌تیا دگه‌ل ئه‌مریكا.
ئه‌م ب هیڤیا به‌رده‌وامبوونا ڤێ هه‌ڤپشكیێ نه د پاشه‌روژێ دا.
ئاشتن كارته‌ر
وه‌زیرێ به‌ره‌ڤانیا ئه‌مریكا
بیست و چارێ هه‌یڤا حه‌فت دووهزار و پازدێ
تعليقات
إرسال تعليق